Бесәй менән турғай/Тамара ИСКӘНДӘРИӘ

Балконда бесәй тора,
Мыйығын майлап бора:
“Берәй турғай ҡунмаҫмы,
Миңә ризыҡ булмаҫмы?”

Турғайҙар ҙа хәйләкәр,
Етеҙ килеп ҡуналар.
Ҡунмаҫ ине, һыуыҡта
Улар бик-бик туңалар.

Балкон ситенә ҡунып,
Күҙләйҙәр емеш-еләк.
Ҡурҡыуҙарын еңәләр,
Ҡурҡыуҙан көслө теләк.

Өләсәй ҡышҡылыҡҡа
Баулап элгән бит балан.
Бесәй күҙәтә ҡошто,
Ҡаранып алан-йолан…

“Тоттом, — тиеп, — ҡошсоҡто!”
Ырғыны ул ҡабалан…
Турғай "фыр" осто-китте,
Суҡышында — ал балан.